Catatan Kecil

Dung sanga mansohot arisan di punguan marga Purba di bulan Desember nataon i, dipamasa ma muse di bulan Januari jala laos dipadomu ma tu acara martaon baru. Sada sian penasehat ma na manjabui. Godang do na ro tingki i jala denggan do mardalan sude acara. Dung simpul marsipanganon, marnonang ma hami, tarlumobi angka naumposo di luar. Nian dang na so siat di jabu ai balga do jabu i, alai ala mansai tabo hami namarnonang i gabe lalap di luar. Godang dihatai disi.

Sahat ma panghataion taringot tu sada keluarga anggota ni punguan. Kebetulan pihak boru namarcerita on. Diceritahan ibanama taringot laena. Laena on tammatan sian kampus berlogo gajah i. Na beteng i. Dang pola sukkunon be taringot hapistaran ni Lae nai. Nga pasti pistar hian. Jadi holan lulus laena on, adongma piga-piga tawaran tu ibana. Adong tawaran beasiswa. Adong tawaran karejo di luar negeri dohot naasing. Jempek hata dohonon, jadima ibana karejo. Holan masa training dope, gajina nga Rp 40.000.000,- sabulan.

Dua minggu karejo, dua minggu off. Tuana i ate, ninna rohangku. Alai pas do i hata ni jolma, dang tartodo nasib ni halak gabe nasib niba. Alai ninna rohangkuma, tuanima dang dohot pardijabu sadarion. Molo dohot hian olo ma gabe rarat panghataion mambege gaji si 40 on. Alai ninna rohangku muse sambalik nai, tabo hian do molo dison pardijabu asa dibege ibana cerita i. Daripada susah rohangku mamingkirhon tumagon disi manang dang pardijabu gabe hukarang-karang ma percakapan imajiner antara ahu dohot pardijabu. Antar hira songononma ra panghataion nami.

Pardijabu (P) sementara Penulis (A)

P: Ah, tuanai nadihatai sinangkinon ate. Holan masa training dope puang nga margaji 40. Hape iba, nga haru lapukon karejo, nga haru songgop satandok rongit marasar tu tanggurung niba, nga marganti taon, malah puluhan taon, gaji pe dang sahat tu 5 juta sabulan.

A : Jadi dia nidokmu boru ni raja? Na mangapian do ho?

P : Mangapian memang. Ho ma jo mamingkiri, mungkin ibana dang tingkos dope ra mamangke salawarna (celana), manang santabi na manghatai, mommonon dope ra ibana, nga karejo iba. Alai sahat tu sadarion tong ma songon-songonon parkarejoan. Karir dang adong. Hepeng dang adong. Loja ni daging somantak. Dang marhasoan.

A : Ingotma inang ni si ucok. Jujur do mula ni hasesega. Bulus mula ni denggan. Molo sai dijujuri ho do sude ngolu ni halak, olo gabe susah pikkiranmu. Sipata mamereng ho tu toru. Unang holan tu ginjang bereng. Jala molo mamereng ho, unang holan nabontar ni simalolongmi baen mamereng asa tangkas boi idaonmu. Alai molo bulus do roham, dao ma hansit ni roha sian ho. Ido ngolu on.

P : Alai ambal ni hata, mansai sonang ma ra inantanai ate. Naeng tu salon boi. Naeng tu mall belanja-belanja adong hepeng di tangan. Molo tung pe tarsor otik hepeng di tangan, tinggal manggesek ATM manang kartu kredit. Martua i tahe bah, dapotna amantana pargaji na balga.

A : Jadi nanidokmu na adong do saotik panolsolion. Sapala ima sinondukmu? (huhut ma antong songon na muruk otik. Alai sahali nai imajiner do on)

P : On ma pintor sai muruk do ho. Namartaringot do hita. Nang pe songon-songoni dope parngoluonta on tong do …. au tu ho. Alai back to laptop majo. Memang songoni do parngoluon on ate. Tong do bekerja keras iba di parkarejoan niba. Alana songoni do situasi ni parkarejoan niba, jolma libur, hami olo do masuk. Hami libur, jolma karejo. Jadi sipata dang marsitomuan. Kehidupan sosial niba sipata olo targanggu. Ambal ni hata, didia do tahe didok nangkin karejo ni amanta eksekutif muda i (mandok na margaji si 40 i)?

A : Bidang mining ninna. So binoto manang aha mining on.

P : Berarti di bagasan sataon, mangihuthon panghataion i, holan hira-hira 26 minggu do ibana karejo ate?

A : Dang huboto bah. Sian dia diboto ho hira-hira 26 minggu?

P : Botul-botul do holan tammat sikkola sore ho. Dua minggu karejo. Dua minggu off. Sataon 52 minggu. Molo dibagi 2 kan hira-hira 26 minggu do kan?

A : Dang malo au marbagi-bagi, marhali-hali do boi saotik. Ai toe muse, ai loja ma ho mangetongi pira ni manuk ni halak. Adong annon manuk ni halak 200 ekor, naeng ho marmanuk 200 ekor. Marmobil halak, naeng ho mangido mobil tu au.

P : Dang pola salah i da. Porlu do pangiburuon dalam arti positif. Asa lebih termotivasi iba. Molo binereng dongan marjabu, bah naeng do iba marjabu dah.

A : Asalma unang songon cerita i. Dibereng inantai tetanggana marmobil, didok ibana tu amantana asa dituhor mobil. Dibereng tetanggana mar berlian, ingkon sai naeng sarupa. Ujungna di sada tingki ninna sinondukna ma tu inanta i. “Dang dibereng ho tetangga parsamping on?” Ro inanta mangalusi “Boha huroha?” Dialusi sinondukna muse “Kan saleleng on ingkon sai sarupa do hita tu halaki. Dang boi uttimbo sian hita”. Ro pardijabuna mangalusi “Torus aha nidokmu?” Dialusi amantai, maksudhu hubereng nga mangoli muse amanta parsamping on, jadi asa unang hatinggalan hita, bah tong ma mangoli au muse. Ujungna marbadai nasida.

P : Gabe rarat do ceritam.

A : Asa unang sai olo do hita on membanding-bandingkan. Ido maksudhu. Alai hudokma tu ho. Memang songoni dope parngoluonon. Masihapianan do. Masing-masing jolma adong do kelebihanna. Molo tabereng parlapo. Burju do manganju angka na minum di lapona. Jolma namarutang dianju. Jolma namabuk dianju. Tabereng amang pandita. Bah, hormat situtu do angka ruas tu ibana. Najolo, di hutanta. Dang piga-piga hali ro pastor tusi. Paling do molo adong natarpasu-pasu manang tardidi. Adong ma tingki i pastor Bulanda do hudok hami. Dang binoto manang na sian Bulanda (Belanda) manang dang. Alai pamotoan niba tingki dakdanak molo halak luar negeri apalagi bule,bah sian Bulanda mai. Setiap lewat ibana, ingkon sude mandada (menyapa) huhut didok “Horas Pastor”. “Horas” ninna pastor i. Sipata olo turun sian motornai huhut dijalang angka dakdanak i. Alai hudokma tu ho yakin au dang godang (molo dang boi dohonon dang adong) hepeng ni pastor. Alai dohot dakdanak na so tangkas mananda ibana pe las rohana marnida ibana. Ima ngolu on. Dang holan hepeng naporlu. Parsaoran dohot lan naasing.

P : On ma gabe kangkung genjer do dihatai ho. Alang sai songon nanaeng marjamita ho.

A : Na ditaringoti ho do jamita. Diingot ho dope aha nangkin tangiang ni sintua tingki tangiang pangondianon? On ma na huingot sebagian “ Ale Tuhan Debata, lehonma hamamalum ni sahit di angka ruas nami namarsahit. Pasu-pasu ubat napinangan nasida. Pasu-pasu tangan ni dokter, perawat, paramedis. Lehon di nasida bisuk na sian Ho i asa marhite tangan nasida boi manghorhon hamalumon di amanami dohot inanami namarsahit. Nga termasuk ho disi. Martua ma ho, hampir tiap minggu do, malah tahe tiap ari dohonon adong manangiangkon ho asa dilehon di ho bisuk, hasabaron dohot lan naasing. Au memang jarang do marminggu, alai dang hea dope hubege tangingan songonon “Pasu-pasu ma angka engineer na lagi manghuar miak di tonga laut”.

P : Nga gabe lamrarat. Gaji Rp 40.000.000,- do tahatai gabe sahat-sahat ho tu Tuhan.

A : My point is ….. (asa songon na jago antong). Molo tapingkiri nanget. Ibana margaji 40. Alai kan nga godang pengorbananna tusi. Sipata do terancam keselamatan kerjana. Dang boi ibana maraha mar marhua do tahe dohot pardijabu tiap borngin. Maksudhu manghata-hatai songon hita. Holan 2 minggu do di bagasan sabulan. My point is balga manang gelleng pasu-pasu najinalo, nihamuliatehonma. Anggo lalap do sai holan namamereng tu langit, hansit rungkungmu. Tingki mandai tobu iba, nidok mauliate tu Tuhan i. Molo dai ni pogu do nanidapot dope, martangiang iba. Hea do hubege dakdanak martangiang alai dang huboto persis manang aha lapatanna. Search ma jo annon di google terjemahan “In my happiness or sadness, oh God, abide with me”.

P : So ma ho. Tumangon ma tapaso panghataion on. Gabe hira na so adong do huida impolana. Toe muse nga bagas borngin. Nga leleng hita namanghata-hata i. Modom ma. Sogot karejo.

A : Alasan karejo do manang naasing? (huhut mengkel suping).

Ala nga lam rarat tu panghataion i tumagon ma hupaso, ninna rohangku. Ai toe muse percakapan imajiner do. Tong do ala agak maol tarpodom, jadi nikarang-karang ma panghataion on huhut marangan-angan maniop hepeng koin tukaran Rp 500,- godangna Rp 40.000.000,- Nga piga keping i? Dang sahat be utok-utokhu tusi. Tumagon modom. Beta be modom angka dongan.
Selamat borgin. The last, atik dia marnipi be hamu, paboa hamu ate, atik dia boi dapotan sogot Rp 40.000.000,-

Parkarejoan serba serbi arisan